جامع البهرة

-يا ماما والله ده جامع جمييل جدا بجد استاذ ،، رائع ، انا أول ما دخلته أصلا ذهلت، الرخام أبيض ناصع بيعكس العواميد اللى فى الجامع،
بجد يا ماما لازم أوديكى جامع البهرة
- يا سلمى بهرة إيه اللى أروحها ، على أخر الزمن أروح جامع للبهرة
- و ماله يا أمى ما هو الجامع ده كان اسمه جامع الحاكم بأمر الله و بعدين طايفة البهرة كانت بتصلى فيه على طول ، فاتسمى جامع البهرة ، و السادات رممهولهم و بأه حاجه وهم.
اصلا لما روحته أول مرة مع دينا وهدى ماصدقناش اللى شايفينو، واسع اوىىى و جميل جدا ( عن نفسى عجبنى أوى)
كمان إسألى محمد وحماده أخو دينا ، هما كمان اتوهموا لما شافوه


- طيب خلاص والله شوفى يوم كده و نبقى نروحو
- كمان ده قريب جدا مننا ، يعنى خطوة بقيتى هناك.،، بس بأه مش لما أقولك نروح تعودى تقوليلى عندى طبيخ وغسيل والحاجات العجيبة دى
- يابنت عيب أنا مامتك
- أيوة أيوة خرجينا من الموضوع الأساسى،، بجد لازم أواديهولك، تحفة بجد،، هيعجبك..

(((( بعد حوالى 6 أو 7 شهور كده))

n أنا زهقانة أوى يا سلمى نفسى أشوف الشمس ،، البيت هنا برد اوى و عايزة أخرج و أشوف شمس
n قشطة عليكى يا ماما بكرة إن شاء الله أوديكى جامع البهرة.
n خلاص ماشى نروح بكرة الصبح كده إن شاء الله.

(( بكرة الصبح))
- صباح الخير يا كوكو
- صباح الخير يا سوسو((اللى هى سلمى يعنى))( أصل ماما واخدة عليا بزيادة حبتين..).
- هعملك الفطار و نروح ،، اوعى تكسلينى
- لا لا إزاى نفطر و نصلى الضهر و نروح
طبعا فطرنا و صلينا الضهر و عملنا الاكل و صلينا العصر،، بس فى الأخر دخلنا نلبس عشان ننزل
- ده انتى هتشوفى دلوقتى حاجه مش ممكن ،، ازاى يا ماما يكون عندنا الجوامع دى و مانعرفهاش
- يابنتى انا كنت ساكنه قريب بس عمرى ما روحتو
- يالا اشكرينى طيبن هنعرفكو حتتكوا،، ماا علينا

- اللللللللللللللللللللللللله اى ده جميييل جدا ،، الله لأ بجد جمييل اوى
- مش قولتلك يا أمى هيعجبك جدا(( أنا أصلا خلاص إن شاء الله هعمل فيه كتب كتابى)
- لا لا واااسع اوىى
- اي ده يا ماما شايفه الحمام و هو واقف على الرخام،،أنا أول مرة أشوف فيه حمام واقف عادى كده و مش خايف من الناس
- شكله حلو أوى ،، بس مش أحلى من الحمام اللى بيطير حوالين الكعبة و اللى قدام المسجد النبوى
- ماشى يا ماما ،، تعالى أما أصورك طيب ،، عشان تقولى لصحابك أنا روحت جامع البهرة
- لا بس بجد يا سلمى حلو أوى ،، بس أه صحيح مش ده جامع أما نصلى ركعتين تحيه للمسجد
- اه صح بهرة بهرة ،، أهو جامع
- تقبل الله يا أخت
- منا و منكم
- يالا يا سلمى لحسن الرخام ساقع و الدنيا برد
- اوك،، بس لازم اوديكى جامع السلطان حسن و الرفااعى
- اه والله انا نفسى اروحهم اوى
- خلاص يا ماما وعد بعد 8 أو 9 شهور كده ممكن نروحه
- ماشى يا سيتتى
- طب بقولك ايه ممكن تصورينى مع الحمام
- طيب هاتى الكاميرا
(( المهم جه عيل رخم ،، وهو ماسك الشبشب للحمام و طيره،، أى نعم اتصورت بس منغير حمام