صدفة

رسمتك فى خيالى، فارسا لأحلامى، و رتبت ميعادنا و كيف سألقاك صدفة، رسمت الطريقة، متى يكون اللقاء و أين بل و كيف؟، كل ذلك صدفة، أرتديت أجمل ما لدى و أضفت لمسات من مساحيق التجميل صرت جميلة كى أبدو بهذا الجمال فى عينيك عندما أقابلك...علنى أقابلك... صدفة
بدأت رحلتى.. نعم لم يكن لقاءك هدفى و لكنى رتبت اللقاء سأقابل فتاى ... صدفة فى يوم ما.. اليوم. ولم لا!
وصلت مقصدى و مشيت وحدى لانهى حاجتى ،.. ها أنا اسير اعلم انك فى طريقك ، و مازلت امشى حتى امنى نفسى بلقاءك ،.. فلتظهر فهذا هو موعدنا كما رتبت له، لماذا لم تأتى فى موعدنا، هو صدفة لكنك ستأتى لقد وعدتنى فى خيالى، عل شئ حدث منعه من الوصول فى الوقت المحدد، انتظرتك فحتما ستأتى تلك الصدفة، انهيت قصدى و حان وقت الرحيل لما لم تظهر حتى هذا الحين، و امضى راحلة، آملة ان يلوح لى خيالك فى الأفق، و أمضى و أمضى فحتما ستاتى و ساراك صدفة، لكنى رحلت دون أن تأتى فى موعدنا الصدفة
و لانى رتبت لها فلم تعد صدفة ، فلن اراك الا صدفة.......

كليتى العزيزة ،، شكرا

خلاص آخر سنة و آخر محاضرة و آخر امتحانات، طبعا محدش ينكر ان المتحانات كانت و مازالت بتسبب ضغط نفسى كبييير اوى، بس بجد كانت ايام جميلة اوى، و ذكريات أجمل وأجمل.
حسيت النهاردة فعلا انى خلصت محطة كبيرة اوى من حياتى،خلصت 15 سنة دراسة(( و ان شاء الله يبقوا 16 بعد شهر ان شاء الله))، مش هقول وجع قلب و مذاكرة بعد الرجوع من المدرسة أو الجامعة، بس فعلا أيام جميلة أوى.
افتكرت لما خلصت ابتدائى و كنت فرحانة انى كبرت و هالبس لبس الناس الكبار اللى فى اعدادى، و لما خلصت و دخلت ثانوى، و انا لابسة لبس مدرستى كنت فخورة اوى انى طالبة فمدرسة ثانوية و بنت كبيرة، وزاد من كده انى كنت فخورة اوى بمدرستى ، و حاسة انها مدرسة أصيلة و بنت ناس ( ده لو حد عنده ليها عريس يعنى).
سيبكوا من كده بأه لما جاتلى اعلام، فعلا فعلا عرفت يعنى ايه واحد طاير من السعادة، يعنى دخلت الكلية اللى كنت بحلم بيها من و أنا فأولى ابتدائى( طبعا غير طب اللى هو أساسى اى بنت صغيرة بتعتبر نفسها دخلتها خلاص ، و أكيد كنت منهم)) بس كنت بعشق حاجة اسمها قراية الجرنان أو أى نوع من أنواع القراية عموما.
المهم طبعا اعلام او غيرها، بس انا فكلية، و ايه بأه كنت حاسة انى أكبر من أى واحدة تانية ماشية فالشارع(فالجامعة يا ناس، بتتكلموا فإيه بس)
كنت بجيب كشكول كبير عشان امسكه و كل الناس تعرف انى فالجامعة دلوقتى.
دخلت الجامعة و بجد بجد ، اكتشفت ان الكلية دى تحفة ، حفلات بأه ( الواحد كان قال ايه ، بيحب الحفلات))، بس طبعا الكلام ده كان أول اسبوع و بعد كده بخ خلاص.
فأولى بقى شوفت دندون و بقينا أصحاب جدا( رغم اننا كنا مع بعض فى الفصل فتالتة ثانوى) بس تحولنا من اتنين مجرد بيسلموا على بعض، لإنها بقت صاحبتى أوىىى،،، فبقينا انا و دينا و هدى( نظرا لان هدهد كانت صحببتى من البداية من أيام تانية ثانوى و مطروح و حوارات تانية كده))
بجد أيام جميلة اوى ، قابلت أميرة قاسم و كنا طبعا عارفين بعض عشان بردو أميرة عشرة عمر من أولى ثانوى.......
و اتصاحبت على خلوووود وايثااار و علا عبد القادر و عائشة و علا عبد الله و سارة الحداد
و طبعا عمرو فهمى
و طلعنا تانية مع بعض و زاد عليهم شيموو اللى هى شيماء مهدى( فاكرة الندوة))) ، و فتالتة عرفت مها و علا عبد القادر بقت صحبتنا جداااا جداا ،، تالتة دى رغم صعوبتها( حاسة انها كانت سنة صعبة نوعا ما طبعا)) بس بجد بقينا كلنا فالجروب أصحاب أوى.
فرابعة بأه بقينا قمة الضياع و تكبيرة الدماغ، حصلنا أحداث غريبة و جميلة و بجد بجد بقينا أكتر من الأخوات فصداقتنا، افشنا كتير بس كان التهييس أكتر بكتيييييييييييييييييير
و عرفت ناس فعلا كسبتهم و كسبت معرفتى بيهم: زى أيمن الشربينى و أحمد عبد الحميد و انجى و ايه و اسماء خليل و أميرة محمود وألفت
أربع سنين من حياتى استفدت فيهم كتير، طلعت للحياة و عرفت شخصيات كتير منهم اللى أثر فيا و منهم اللى فادنى فحياتى عن قصد أو من غير قصد ، بس بجد فى ناس افادونى...
و معلش هاهدى شكر خاص جدا جدا جدا ل:
دينا: ( بجد يا دينا أى نعم انا متخرجة من كلية الإعلام،، قسم الصحافة، بس كل ده كوم، و انى متخرجة و دينا سماحه هى انتيمتى و صحبتى و أختى ده كوم تانى خالص ، و عندى أغلى من أى حاجة تانية))
علا: احب اقولك يا علا انك ملاك ماشى على الأرض، انتى خلتينى اصدق ان فى بنى آدم ملاك. و ربنا يوفقك فى حياتك العملية، و العلمية اللى فى اسكندرية، اجمد محافظة مصرية.

هدى: على رأى حمادة أخو دينا شوكة و سكينة،، بس بجد من و احنا فى تانية ثانوى و انا بحب فيكى براءتك و بحس انك اختى اوى، و غير كل ده انتى فعلا و الحمد لله بقيتى اختى، و ربنا يارب يديم علينا الأخوة يا هدهد و مفضل مع بعض لحد مانحضر فرح يويو ان شاء الله.
خلود و ايثار: معلش جيتو مع بعض، بس عشان انتو طول عمركو مع بعض و يارب تفضلوا مع بعض على طووووووووووووووول.و نفضل مع بعض على طول
عائشة: لكى ان تعرفى انى كنت ببقى متأكدة و انا معاكى ان الوقت ده مش هعمل حاجة تغضب ربنا ابدا، و انك علمتينا معنى الشخصية القيادية عن حق و عن فكر ، بجد صعب اوى انى الاقى واحدة زيك ( ماشاء الله ))
أميرة قاسم: طبعا انتى على اخرك و مش فالموود خالص ، بس بردو صحفية و بنت جامدة و جدعة جدا ، و كفاية انك صحبتى من أولى ثانوى
عمرو فهمى: انت انسان واثق من نفسه لدرجة كبيرة( من وجهة نظرى على الأقل، و دى حاجة كويسة اوى ))، استفدت منك و من آراءك فى حاجات كتيرة و اتمنى انك ماتحرقش الايميل بتاعك بعد التخرج
أيمن الشربينى: للأسف ماعرفتكش غير فى رابعة ، بس بجد انت من الناس اللى فعلا كسبت معرفتهم، كفاية انك من ابناء الاسكندرية
شيماء: طبعا انتى عارفة اننا كانت بداية معرفتنا للأسف فى ندوة و للاسف عشان انتى عارفة اد ايييه كنت بحب الندوات دى، و بجد انا انبسطت اوى لما كنت بجرى معاكى ، و لا أيام التايكندو هزلك بيها. و بس ياريت نقلل لماضة شوية عشان كده خطر
علا عبد الله: مش هنساكى لانك واحدة من اول الناس اللى عرفتهم فالصحافة،، و يارب ربنا يوفقك فالمصرى و تبقى صحفية آآآآآآد الدنيا

و طبعا بابا اللى تلاقيه هو المستفيد الوحيد من تخرجى عشان هرحمه شوية من المصاريف و ماما اللى استحملت فترات الاكتئاب الله لا يعيدها.
بجد فى ناس تانية كتيير اوى حبيتهم جدا و أثروا فييا اوى

نظرية المعاناة

طبعا كلنا كبشر بنتمنى حاجات كتير، و طبعا الحاجات اللى بنتمناها بتكون حلوة أكيد،، و بالفعل أول ما

الحاجات دى بتبتدى تظهر و تبان، نبدأ نهئ نفسنا ليها ، لكن لو لقينا ان فى صعوبات كبيرة، بنبدأ نتضايق و نزعل و طبعا ممكن يجى وقت نحس ان الكون كله تآمر ضدنا.
لكن الحقيقة أنا طول عمرى مؤمنة جدا بنظرية المعاناة( ومعرفش إذاكان فى فعلا نظرية اسمها كده ولالأ))، لكن أنا مؤمنة جدا إن لما الانسان يعانى فى سبيل لحصول على شئ، ده بيدى للشئ طعم تانى خاااااالص، وأحلى بكتير جدا من لو إن الحاجة دى جت بسهولة، مش قصدى طعم إن لو حاجة جات منغير معاناة مش هايبقى لها طعم، لأ مش قصدى، لكن لو كان فيها معاناة الاحساس بجمال الحاجة دى هيبقى احساس تانى
يعنى مثلا، وعلى سبيل التجربة الشخصية، واحد نظرة 6\6 طبعا بيبقى سعيد جدا ان نظرة سليم و 100 100، لكن تعالى بأه لحد زيى، كنت يادوب من غير نظارة بشوف خيالات(( وطبعا كان الحمد لله أوى))، لكن بردو أول ما النظارة تكسر أو العدسات تخستع الحياة بتضلم فعينى ، ومأساة بأه لو رايحة فرح أو نزلت البحر، فنرجع بأه للموضوع الأصلى، أول ما عملت عملية الليزر و بقيت أشوف 6\6 ماتتخيلوش كم السعادة، بجد ماكونتش مصدقة انى فعلا صحيت من النوم و شايفة كده عادى ( يااا خبر)) ، فده قصدى هنا سعادة لا تووووصف.
و فعلا أنا مؤمنة جدا بالنظرية دى و هفضل طول عمرى مؤمنة بيها إن الانسان لما يعانى بيبقى طعم الحاجة اللى بيحصل عليها تااانى خالص ، غير لو خدها بسهولة أو لو هى عنده على طول
زى اللى كان عندى واحدة صحبتى هى أكبر منى بحوالى 9 سنين و عايشة مع (زوجة باباها) كانت تعد تقولى أنا فرصى فالجواز بتقل و بجد صحابى بيتجوزا، فكنت اقولها انتى أحسن من غيرك ، لما تعانى شوية مش هتصدقى نفسك لما تتجوزى ان شاء الله،، و فعلا هى دلوقتى جالها واحد كويس و طباعه وأخلاقه ممتازة، و فعلا حست بطعم مختلف أكتر من لو كانت أجوزت بسهولة . طبعا اللى مش بيعانى بيبقى مبسوط جدا، لكن مع المعاناة السعادة بتختلللف جدااااااااااااااااااااااااااااااااا. و قيس على كده فى الرياضة و الدراسة و الشغل و و و و و و ....
و ده ممكن نقيسه على حاجات كتير فى حياتنا و فعلا أكيد هنحس بمعنى الكلام ده.