جالى تانى تاج من المازمازيل هت هت ، و شكلنا مش هنخلص من الحوارات دى، فاضية أنا بأه عشان ليل نهار قاعدة اجاوب فحوارات كده، بجد انا مش فاضية خالص و موارييش أى حاجة (قريتو صح بس كملوا)
بس ما علينا كله يهون عشان هدى شوكة و سكينة(اقتباس من حمادة)، ها بأه عايزة ايه عشان ننجز
من هو:أحب شخص لقلبك فى الدنيا؟
طبعا (بعد ماما و بابا) عشان كلنا هنقول ماما و بابا و لو ماقولناش كده هنبقى بنشتغل نفسيتنا و عن نفسى، ليهم مكانة لوحدهم نهائى لا تقبل مقارنات، فأنا هنطلق على اساس ان دى قاعدة( حد فهم حاجة))... ما علينا
أحب شخص ليا دلوقتى هو محمد ، أى نعم بيرخم عليا و بيطلع (تييييييت... : ) فى الأحلام، بس ده ميمنعش انى بموت فيه(أخويا يا جماعة واللهى)، أصله بيدينى فلوس و بيجبلى بيبسى كانز رغم انه مش بيحبنى اشربه ياااه شوفته كل ده و ماحبوش يا خبر .
و بجد بجد مش نفاق أو مجاملة صحابى عندى بالدنيا كلها. و هما طبعا عارفين نفسهم .
اللى بعده
انسان مستعد تضحي بحياتك - ركز فى كلمة حياتك- علشانة؟
طبعا اللى إيده فالميه مش زى اللى إيده فالنار يعنى دلوقتى ممكن أديكو ليسته باللى أنا مستعدة أضحى بحياتى عشانهم و ساعة التضحية آدى دقنى لو حد منهم لقانى، بس مش شرط انى أحب انسان أوى عشان أضحى بحياتى عشانه ، ممكن انسان معرفوش فى لحظة ما اضحى بحياتى عشانه حسب الموقف هو اللى بيفرض عليا، ممكن اضحى بيها عشان واحدة صحبتى عشان ماما عشان أى حد معرفش....ممكن.
ها خلصت
اسم أول حب؟
يييييي جينا للأسئلة اللى مالهاش أى لزمة، و بعدين انا ممكن اقول ماما و بابا و محمد ماهما دول أول ناس شوفتهم واتعلقت بيهم، بس انا فاهمة قصد السؤال((سوسة أصلى) و بفهمها قبل ما تطير، و بعدين يعنى ايه اللى ممكن يحصل فالبشرية لو قولت، ايه حجم التغيير اللى ممكن يحصل يعنى، أكيد ولا حاجة
فنضيع وقتنا ليه بأه و بتاع
و بردو مش هنوّلكو غرضكو ، طب مانا ممكن اقول حسنين(فى حال ان وجد طبعا)، عرفتو انتو بأه مين حسنين(آدى دقنى لو حد عرف) شوفتو بأه ان كان عندى حق
اسم اخر حب(حتى الان)؟
بردو نفس الكلام ممكن أوى أقول صحابى، لكن بردو فاهمة قصدكو بعد صحابك، ميين بأه هه ميين؟؟!!
طب مانا لو قولت ماحدش هيعرف(طبعا على افتراض لو فى)، و بعدين يا سيتى انا مش عايزة أقول، ايميلى ماهو ريحته طلعت خلاص فى البلوج اللى عايز يعرف يراسلنى على الميل و أنا اوعده هقرا الايميلز اللى بتجيلى و هنرد عليها فى أقرب وقت، و سعر الشحن ثابت و سعر المنتج ثابت اينما كنت تسوق الآن عبر البريد الاليكترونى
اى ده انا فكست خالص( خفة موت يعنى)
ما هو :اسم أجمل كتاب كتبه بشر قرأته ومحتفظ به حتى الان ؟
والله انا بردو مكسوفة من السؤال ده لإنى بقالى كتير قاعدة اقرا و الكتب من كترها دخلت فبعض و انا مش مراجعة و حالتى كرب خالص، مش تقوله ان فى أسئلة صعبة، على العموم رواية دافنشى كود قريتها و شدتنى طحن، هى اللى معلقة معايا دلوقتى(أكيد مش أحلى كتاب كتبه بشر ، يعنى مش أوى كده، بس من وجهة نظرى الخاصة جدا، أوى و أوى كمان).
اسم كتاب-كتبه بشر برضة- انت متعلق بيه وبتقرأه كل فترة؟
دى بأه هى الأعمال الكاملة لإيليا أبو ماضى، مالآخر راجل معدّىىىىى ، تقريبا حفظته كتاب رائع،
للأسف قراءاتى الدينية فى حاجة للزيادة و العمق، بس أعمل ايه آدى الله وآدى حكمته،لإنى بجد ما كونتش بعرفش أذاكر إلا و كتاب عم أبو ماضى جنبى صفحة من ملزمة و جمبه صفحة من إيليا، بتعب أوى والله
شىء تحس بالراحة النفسية عندما تنظر اليه ؟
كله قال الغروب الغروب و البحر طب و ماله الشروق و حش كُخه صغير مثلا، بس بجد و انا حالة شاذة لو كنت مكتئبة ولا الجن الأزرق يعرف يخرجنى، بس انا برتاح نفسيا لما بشوفنا احنا الأربعة( ماما و بابا و محمد) قاعدين مع بعض و بنضحك المنظر ده يارب ديمه علينا بيخلينى أعيط من السعادة
مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
فيصل، آه والله أول ما نكون على كوبرى فيصل و بلوح فى الأفق هذا الشارع المزدحم (ليا فالأدب بردو أومال ايييه) بجد بموت فالشارع ده بزحمته و ناسه و محلاته. بحبه اوى
كمان لما بقف فى البلكونة فاسكندرية بحس بحنيين لحاجات كتير أوى و فعلا مش عارفة ايه هى بالظبط
مكان تحس بالراحة عندما تدخله ؟
- النادى، بيتى التانى ، ممكن أعمل اى حاجة بعملها فبيتى، أهزر براحتى و اجرى براحتى و العب براحتى
- كمان بحب أوى كارفور ليه ماعرفش ليه معايا انا بس ذكرى رغم انى مارحتوش غير مارتين لكا أول مرة كانت مرتبطة بقرار صعب خدته و كل ما بروح بفتكر القرار و بيجيلى ثقة بنفسى أوى إنى عرفت أقرر حاجة.
طبعا كله نفسه يعرف القرار، لكن ده بعدك يا جمييييل.
اجمل مدينة زرتها داخل مصر ؟
مصر دى كارثة فيها شوية أماكن رهيبة، يا عم انت لو روحت الشارع اللى وراكو هتكتشف حاجة جامدة جدا
بس عشان ماطولش عليكو، أجمل مدينة كانت دهب، يمكن الجو النفسى بيضفى روعة على المكان، بس هى و شرم الشيخ بجد جنة الله فى الأرض ، المكانين مايقلوش عن بعض فالجمال و الروعة و الابداع(سبحان الله)
أجمل مكان طبيعي رأيته داخل مصر؟
فى حتة كده عند حمام كليوبترا فى مطروح فعلا ماشوفتش و لا هشوف ولا ممكن أشوف فى روعتها.
و اللى عايز يروحها، اول ما يبقى فمطروح يدينى رنة و انا هديله العنوان على طول ، هتكلم أنا ماتخفوش أوى كده يعنى(على فكرة هتوهه عشان المكان ميتزحمش –رخمة اوى يا سااااتر)
اهم جهاز منزلى انت متعلق بيه او بتستخدمه كتير ؟
أكيد الكائن اللى أنا شغاله عليه دلوقتى، و بجد التلاجة لا تقل عنه فى الاستخدام( الكمبيوتر فالأول عشان الاحراج بس أوك!)) و بعديهم البوتاجاز. بس الكمبيوتر فى الصدارة.
سرعة بروسيسور جهازك ؟
معرفش، بس ليه يعنى خير، حد عاوز يشترى!؟؟
حجم ذاكرة –هارد- جهازك ؟
الله هو تحقيق! مش هبييع و هو ما شاء الله اسم الله على مقامو 120 جيجا(أكيد مش 120 كتكوت مثلا)
نوع هاتفك المحمول؟
طب مثلا نمرة هاتفك المحمول هقول ماشى، سعر هاتفك المحمول هقول يمكن حابب تشترى ولا طلعلك فيه حوار، لكن نوعه!!! غريبة
هو النوع متغير لإنى حاليا بتجول فى موبايلات العائلة الكريمة و كتّر خيرها ماما((مديانى بتاعها)) و ضحِّت و خدت القديم( الأم أم يا جدعان مش ممكن)
و على العموم عشان مابقاش رخمة، موبايلها اللى أنا طبقته أو بالأصح مبرجته عليه 6610 i
المساحة التى تشغلها المواد الاسلامية على جهازك ؟
عندنا مساحة لا بئس بها، بس و بعديييين! ايه مساحة الاستخدام؟ مش شرط مساحة المواد، و مساحة تطبيق هذا الاستخدام ده المهم أكتر
نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
..........، بس بجد نفسى تكتر أوىىى(قفشت شوية بس معلش ، الموضوع فعلا يستاهل)
أهم هدف انت واضعه لحياتك دلوقتى ؟
حاليا حاليا المؤسسات الإعلامية طالبتنى( كلها و بدون استثنا)، بس انا نفسى اشتغل فى جريدة او مجلة أو وكالة أنباء، و اثبت نفسى و اتعين (يااااااااارب))و افكنى من حوار الكسل اللى انا عايشة فيه ده، كمان نفسى ابقى مصورة صحفية( دينا هتشييط دلوقتى، بنافسها فالكار بأه)
بس انت قولت دلوقتى، هه، دلوووقتى، ماعرفش بكرة الصبح هيبقى ايه يعنى
مواصفات فتاة –أو فتى للبنات- الأحلام بالنسبة لك ؟
لا لا فتى فتى، انا اللى فتاة( قال انا فتاة أحلام بنى آدم ما، يا ويييله)
و كمان بأه و من الآخر كلنا بنقعد نتشرّط و نقول يكون أمور و متدين و أخلاق و غنى و شعره أخضر و عينه تركواز، و يجى واحد عكس كل اللى احنا شارطينه و نقبل بيه، طب تعبنا نفسنا ليييه، هو الواحد بيدعى ربنا انه يسعدنى، و هو يشوف بأه الطريقة اللى يسعدنى بيها، انا كمان هتعب نفسى ! مش كفاية اوى انى ذاكرت و هاشتغل، هى ايه سرقة
بس هو الميزة ان الانسان بيتعلم طول ماهو فى الدنيا العجييييبة دى، و أكيد لو تنازل عن حاجات مايجيش بأه يعيط منها، و فى حاجات ثابته و مش هاقولها لكونها بديهيات( متدين و أخلاق و الكلام بأه هيبقى على الطباع دى اللى هيتنظر فيها )
اجتماعيا: فى تقارب و دى بجد مهمة طحن.
ماديا: مهمة بس بمستوى معين مش جامد أوى يعنى.مستقبله أهم حاجة( مش مضمونة)
فكريا: و دى بردومش مضمونة لإن كتير بيرسمو حلو أوى ( مش فالحين غير فالرسم)
و يارب العيب اللى يكون فيه يكون مقبول من وجهة نظرى و وجهة نظر بابا و أخويا و ماما( هسيبلها العيوب اللى فحماتى)
صف ما يأتى :شعورك لما بتسمع كلمة مصر؟
بحبها، فعلا فعلا مراية الحب عامية، و كمان انا بحب ماما و بابا عشان ربنا اخترهم لينا، كويسين وحشين بس لازم احبهم
مصر حاجة شبيهة ربنا اختارلى أكون مصرية فلازم أحبها، و بالبلاوى اللى فيها لكن بفخر بيها(ده قصر ديل مش أكتر)
(لغة ركيكة أوى، اى ده)
شعورك لما بتسمع كلام عن اليهود ؟
بخاف أوى، و بخاف لو شوفت بنى آدم يهودى، بفتكر الجشع و الخيانة و السرقة
رغم التطور اللى هما فيه أو التقدم، إلا انه فنظرى ولا حاجة جنب اللى هما فيه
شعورك لما بتشوف ظابط شرطة ؟
السؤال ده ليه عندى اجابتين بالظبط اجابة مجاملة(نفاق نوعا ما) ألا وهى
عادى بنى آدم عادى جدا فى منهم الكويس و الوحش.بشتغل نفسى
الإجابة التانية و من غير زعل:لا لا خلاص هتزعلو:طب انا هقول و مش هزعّل حد منى
بحس انه( و بجد الأغلب و ليس(((الكل)))))....) انسان معاه سلطة زيادة و بيستغلها غلط عشان عقد نقص مستشرية ، هتقولوى طب ما العقد دى و الحمد لله موجودة ، هقولكو اه ما السلطة بأه بتعمل عمايلها( أى نوع سلطة)
بس ماجتش على جهاز الشرطة اللى هنتكلم فيه، ما شاء الله انا عايزة جهاز واحد عدل
شعورك لما بتشوف الكناس العجوز فى الطريق ؟
بقول الحمد لله على اللى أنا فيه و بتساءل عن احساسه، ولما بشوف ضحكة على وشه و هو بيهزر مع زميل ليه واقف، بفرح أوى ان ممكن انسان فى الموقف ده و عنده قناعة كده.
بس أكيد الحمد لله
لون البطانية اللى بتتغطى بيها فى الشتاء ؟
انا بتغطى بلحاف، يعنى لو كنتو قولتو لون الغطا كان زمانى مجاوبة و زى الفل،أعمل ايه بأه
بس لحافى لونه مش ابيض هو اوف وايت، و فيه حاجات زرقا و حمرا كده، عسل بموت فيه
لون الجورب-الشراب- المفضل لديك ؟على حسب ، فى موف ، فى برتقانى، مش بحب لون شراب معين، و كمان لسه ماجاش الشراب اللى اموت فيه و أفضل لبساه حتى و هو مقطوع.
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
عادى يعنى بنى آدم عادى، حتى لو باطنه مش فى قمة الألتزام، بس اديه بيحاول و ربنا معاه
بس بحزن لما ألاقى واحد كده، و بيستغل اسم الدين، و ماحدش يبص و لا يعمل حواجبه كده، عشان فعلا بقوا كتير و عن تجربة .
احساس يراودك فى اشارة مرور مغلقة بسبب مسئول كبير؟لو مستعجلة ، أعد اقول :
ايه هو فاكر نفسه مين كلنا هنتحاسب مع بعض فالآخر، كلنا سواسية كأسنان المشط
و لو مش مستعجلة و لسه بدرى:
ياله كويس اننا نزلنا بدرى، لا لا بس لما يطوِّل بجد بأه بتنرفز ماهو مش أسلوب ، زى ما سيادته عنده مسئوليات ، احنا كمان ورانا حاجات،احنا بردو ناس كبارات و عندنا حوارات عايزين ننجزها، بس هو الحس الفردى هو المسيطر اليومين دول.
أمرر التاج بأه ل.....
DR-Killer -
- التنين(رغم انى عارفة انك بتشتغلنى بالبلوج الخيالى اللى انت بتقول عليه) و أءمل أن أرى بلوج ليك يا تنين.
-
مصطفى موسى( أى خدعة)
