Tuesday, December 04, 2007

شيكوز تاج


.

جالى تاج من شيكو صديقة الكفاح فى قاعات الساقية و على ملاعب الجامعة و داخل صفحات صوت الجامعة ( جريدة مشهورة توقفت عن الصدور ، الدولة وقفتها عشان كانت مؤثرة اوى وقتها J)))))
المهم،، طبعا شيكو لما تقول على كلام لازم انفذه ، اصلى بحب حوار التاج ده مسلى اوى و طبعا يا جماعة انتو عارفينى ، كتاب مفتوح يعنى نياهاهاهاهاهاهاهاهععع ، ما علينا ها بأه عايزة ايه عشان نخلص من الحوار ده بأه بسرعة؟؟

أنت مين؟

مين بالظبط عايز يعرف يعنى،، اعتقد اللى عارفنى عارفنى ، بس معلش مين الظريف اللى متقمص شخصية سعاد حسنى و على أمل انى أكون أنا حسين فهمى يعنى!!!
انا سلمى ، برج الحوت، و الارنب فى الابراج الصينية، و أكيد كلكو استنتجتو انى كلى مميزات و أهم ميزة فياالتواضع و عيبى طيبة القلب ايه فى اعتراض!!

مين أكتر 6 أشخاص بتحبهم؟

ماما و بابا و أخويا و دينا و خالتى معتقدش يعنى اللى بيقرا ممكن يعرفها عشان هى مش على الفيس بوك، و هدى و سارة و شيماء و صحابى كلهم يعنى ممكن بتاع 15 كده بحبهم اوى
لكن 6 بس موعدكوش يعنى.....

أنت سعيد؟
ايه الذكاء ده انتو مش لسه بتقولو انت مين و قولت سلمى!!!
ما علينا،، اه تمام الحمد لله، قشطة ، هو فى المجمل آه الحمد لله ، الحياة وردى و بيس و كل حاجة ، بس انا فى الآخر يعنى بنى آدمه طبيعية ( هو الصح بنى آدم بس بتتقال كده) يعنى بكون مبسوطة تقوم تحصل حاجة تضايقنى مثلا فاتضايق و ارجع انبسط تانى كده يعنى ، اعتقد ان أنا طبيعية نوعا ما...بس حاليا سعيدة الحمد لله وا تمنى افضل كده على طووول ..

لو اجتمعت أنت وحسنى مبارك فى غرفة واحدة؟

أوبااااااااااااا، جالك الموت يا تارك الصلاة.... عادى يعنى معتقدش ان ممكن يجيلى الجرأة انى اقول على اللى انا عايزاة، بس مش حاساها حاجة واو يعنى، و كمان مبارك عادى بنى آدم بكرة جمال يمسك مصر و هو يروح دار مسنين و يبقى من ده بكرة بقرشين..

من غير رغى يعنى ، لو كان باب الحديث مفتوح عادى يعنى، هتكلم معاه و أقوله ان الجنيه فالنازل و حكومتك بتقول اننا حققنا أعلى معدلات للجنيه، هقوله ان الشقق غليت و كل يوم يطلع تصريح ان الحكومة بتوفر وحدات سكنية آدمية، هقوله ان الاسعار بتغلى و انتو بتقولو غير كده، و ان مصر بتنفجر و انتو مبسوطين بوزارة النقل اللى مصر فى عهدها شهدت زحام غير طبيعى ، و ان الناس اتخرجت و مش لاقيه شغل و كله طلع على بره و انتو بتقولو انكو وفرتو 4 مليون فرصة عمل (طب فيييين)... بس اعتقد انى بعد كده خلاص ،لانى لو مابقتش فى المعتقل هكون فوق...

لو معاك مليون ونص جنيه ......تعمل بيهم ايه؟

مع انهم مش حاجة جامدة انا نفسى فى 6 مليون (مش أقل يعنى)،، بس مايخسروش بردو، مش هنرفض النعمة،
100 ألف أجيب عربية
100 ألف عربية لماما ، و طبعا 100 عربية لأخويا و 100 لبابا و 200 لصحابى يجيبو اللى هما عايزينه و هم مع نفسهم بأه يقسمو براحتهم و لو الفلوس خستعت معاهم انا ولا أعرفهم.

كده هيتبقى 900 ألأف، أخويا هديله 300 ألف كده و فى مبلغ شيلاه للخير بس مش هقول كام (قال يعنى المليون و نص معايا خلاص) و أحط الباقى فالبنك و بلاها شغل بأه أو اشتغل" فانى" و كل يوم هاكل فى هارديز و كل خميس هاروح الجراند كافيه غنية بأه، بس يعنى عشان محدش يفتكرنى طماعة انا هعمل الحساب باسم بابا و ماما و اخويا ،يعنى حساب مشترك.. يالا هم طول عمرهم جدعان معايا بردو.

بتحب مصر؟

لأ ، من شهر بس كنت آه ، لكن دلوقتى خلاص بأه .

بتحب البنات؟

مش كلهم ، و مش دايما

أنت مسلم؟
الحمد لله

ليه؟
نعم!! على العموم سؤال ماحدش ليه دعوة بيه



مين أكتر شخصية ما تقدرش تستغنى عنها فى حياتك؟
أى شخصية اتعاملت معاها و أثرت فيا، لما بتمشى أو بتختفى من حياتى أكيد بتسيب فراغ مكانها.

ايه أكتر موقف محرج اتعرضله فى حياتك واتصرفت ازاى؟
مش فاكرة، و اكيد لو كان محرج يبقى الحمد لله انه خلص اصلا ، ايه الرخامة دى و كمان إذا بليتم فاستتروا

ايه الأمنية اللى بتدعى ربنا دايما أنه يحققها لك؟
طبعا الواحد لما بيدعى بيدعى ان ربنا يعمل اللى فيه الخير.
بس عن نفسى بدعى ان ربنا يوفقنى فى شغلى حاليا و انى اعمل حاجة مفيدة للناس تفكترنى بيها بعد ما اموت،

أمرر التاج لمييين؟! يعنى نظرا للانتقادات الحادة اللى بتوجه للتاجات، فأنا هكتفى بالاجابة عليه و اللى عاجباه الأسئلة يجاوبهم و يقول سلمى بعتاهولى..

16 comments:

shimaa mahdy said...

سلموزتى

وحشتينى جداااااااا، وحشنى كلامك اللى زى العسل ده، ووحشتنى لماضتك الجامدة جداااااا

ولما مررتلك التاج كنت واثقة انك هتجاوبى بنفس الأسلوب ده بس برده ضحكتينى

والأحلى بقى شيكوز ، دايما بتفتكسيلى أسماء جديدة

عموما يا سلموز أنا دخلت وكتبت كومنت أهو علشان تعرفى إن أنا برده ما أقدرش أخرلك طلب، وإن أى حاجة سلمز باشا يطلبها يبقى علم وينفذ

وبجد لازم أشوفكم بقى، بقالنا ست شهور مش عارفين نتقابل ، حرام ولا مش حرام

Anonymous said...

والله عسل

saloma said...

أكييييييييييييد حراااااااام يا شيكو، بجد انتى اللى وحشتينى اوىىىى اوىىىىى، ولا يوم من ايامنا مع بعض بجد...

على العموم نورتى البلوووج يا باشا و ياريت تنوريه على طووووووووووول



gazzar50
:)))))
بجد انت اللى وهمىىىى، مانسيتكش أهوه فى البوست (; و شكرا على يوور كومنت

ا بـن عــمــر said...

ههههههههههههه
دا اول تعليق على خفت الدم


ردودك جميله
بس كدا كل الفلوس لكى ومفيش حاجه لى
هههههههههههههه


تقديرى واحكرامى
لكل من يجهد نفسه ليسعد غيره

Anonymous said...

هههههههههههههههههههههههههههههههههه
يخرب عقلك شو مهضومه ، بتعقدى عن جد يا صيبه ..
تقبرينى شو كل هايدى خفة الظل ما فى بعد هيك :D
كتير عجبتنى ردودك وضحكتنى .. وكتير حسيت بحالى لما ذكرتى اسمى ضمن أحبابك المقربين ولو انى اجيت فى المرتبة التلته بس رضااااااااا أحسن من ولا شى :p
بس ياللى تاعب حالى كتير ومأثر بى انك ما خصصتيلى اشى مبلغ هيك من المليون تبعاتك ابدأ بيهن حياتى ، عموما مو مشكل بعرف انك كريمه وان يالمبلغ ياللى حكيتى عنه لاعمال الخير كله مخصص لألى :)

بتأسف منك حبيبتى بعرف كتير طولت هلا صار لازم أفل ..
تكرم عيونك يا صبيه شو اشتقتلك

Anonymous said...

*سورى تعديل واجب :
أجيت فى الترتيب السادسه مع مرتبة الشرف

saloma said...

بالتأكيد ما فى احكى متلك، ها الحكى كتييير كتييير بيلبقلك، و أكيد حالى ما راح يصير متلك فى الحكى و ما بصيييير مهضووووومة متلك حالك...
أولا انا قولت "و" و مقولتش "بعدين" تفرق، "و" يعنى الترتيب عشوائى أما "بعدين" فبخصص المرتبة و تدرجها ده أولا... و لازم تاخدى بالك انى قلت 6 استحالة لو عملو قرد أو اتنططو :))

ثانيا المبلغ اللى لأعمال الخير ما هو إلك و متل ما هو مو إلى
بس المبلغ اللى بالبنك هديكى منه كل ما شو بدك...

أنا كلى لإلك يا دودووووو، عشان انتى دودو، اما بالنسبة لخفة الدم فعيزين جديد فى التعليق لو سمحتى (نيااهاهاهاههاهاهاهعهعههعهعهعهع)

saloma said...

ابن عمر:

فى شوية فى البنك لسه، ممكن تبقى تقدم طلب و نشوفك بردو من المليون و نص

alzaher said...

شكرا على تشريفك لمدونتي
مدونتك مميزة فعلا
:)

saloma said...

alzaher
سعيدة بالمرور :-)

Anonymous said...

التعليقات دى ميكتبهاش غير واحدة ادارجية, و مش فارق معاها التنين.

saloma said...

تنييييييييييييييييييييييييييييييين
طب والله نورت البلوج و البلوجات اللى جنبينا و بلوجات المنتقة كلها يا برنس
:)))))))))))))))))))

mohamed said...

سلمى.. سلمى

ممكن اعتبر نفسي من اللي هتوزعي عليهم الفلوس :))

saloma said...

مش هينفع كده، طب قولى أروح فرايديز منين بأه،، على العموم ممكن اديك بتاع خمسين ستين ألف، هو مبلغ قليل بس الإيد قصيرة و العين بصيرة..

Ayman Elsherbiny أيمن الشربيني said...

بعض الأسئلة غاية في الاستفزاز، وبعضها مش مفهوم زي انت بتحب البنات، طب انا لو راجل ايه لازمة السؤال ولو بنت برده ايه لازمة السؤال

الاجابات طبعا فيها النكهة الفكاهية اللي متعودين عليها منك :))

saloma said...

فعلا أحيانا بيبقى الواحد جواه شحنة و مستنى أى حاجة تستفزة يطلع فيها، جت فى التاج بأه المرة دة :))))

و طبعا نورت البوست :)