زمان كده من بتاع سنتين، أيام ما كنت لسه فى الجامعة فى سنة تالتة، كان عندنا حاجة اسمها مشروع تصوير ، فى مادة التصوير الصحفى، تقريباً من المواد القليلة اللى فادتنى جداً و علّقِت معايا ، مادة رغم إنىإلى حدٍ ما نسيت النظرى بتاعها، إلا إن العملى كان شيق و ممتع لأقصى درجة، اختارنا مشروع عن" قاهرة المعز"، كنا الثلاثى الجامد جدا( دينا و هدى و سلمى اللى هيا حضرتى)...
روحنا أماكن كتيييرة أوى و شوفنا مناطق عجيبة عجيبة يعنى، و اتعاملنا مع ناس اشكال و ألوان، بس الأهم اننا عرفنا مصر القديمة بشوارعها و جوامعها و مآذنها و مدقاتها( مش أوى يعنى ببالغ حبتين طبعا)
بدايةً مشينا فى شارع المعز و دخلنا جامع البهرة و ده جامع أكثر من وهمى كنت كتبت عنه قبل كده، و جامع السلطان قلاوون و جامع عمرو بن العاص و أحمد بن طولون، و بيت السحيمى و وكالة بزرعة، ده غير باب زويلة و من غير تريقة ": سبيل أم عباس و سبيل نفيسة البيضا".... حاجات يا جماعة لازم بجد تتشاف، كمان مشينا فى الغورية و روحنا جامع الأزهر و و خان الخليلى و حارة النحاسيين، لا لا أماكن وهمية فعلا...
روحنا أماكن كتيييرة أوى و شوفنا مناطق عجيبة عجيبة يعنى، و اتعاملنا مع ناس اشكال و ألوان، بس الأهم اننا عرفنا مصر القديمة بشوارعها و جوامعها و مآذنها و مدقاتها( مش أوى يعنى ببالغ حبتين طبعا)
بدايةً مشينا فى شارع المعز و دخلنا جامع البهرة و ده جامع أكثر من وهمى كنت كتبت عنه قبل كده، و جامع السلطان قلاوون و جامع عمرو بن العاص و أحمد بن طولون، و بيت السحيمى و وكالة بزرعة، ده غير باب زويلة و من غير تريقة ": سبيل أم عباس و سبيل نفيسة البيضا".... حاجات يا جماعة لازم بجد تتشاف، كمان مشينا فى الغورية و روحنا جامع الأزهر و و خان الخليلى و حارة النحاسيين، لا لا أماكن وهمية فعلا...
من الأماكن اللى علقت معايا و عجبتنى أوى هو مسجد السلطان حسن و الرفاعى اللى قدامه على طول..بس خلينا فالسلطان حسن دلوقتى ، بناء رائع ،، طبعا انا ماكنتش أعرف عنه أكتر من اسمه،، لكن عرفت بعد كده ان السلطانُ الناصر "حسن بن محمد بن قلاوون" بناه سنه 1356م، و كان جامع و مدرسة و بيمارستان اللى هى حضَرَتكم مستشفى ، كانو بيكَروتوا العالم زمان، يجى السلطان من دول يعملَّك مبنى كبير حبتين و يقولك ده جامع و مدرسة و مستشفى بأه و بنعمل محو امية و تعليم كروشيه، لكن يا سلام دلوقتى تلاقى مدرسة لوحدها أى نعم صغيرة مش مهم و يعملك اوضة كبيرة متر فى متر تحت منفصلة و يقولك ده جامع ، شايفين الشغل.. ما علينا!
المهم الجامع من جوة مذهل، بناء رائع ، آية فى الذوق الرائع الواعى السليم، المنبر معمول فيه شغل جامد جدا رخام و فسيفساء، ده حتى كتير أوى من الأثريين سموه هرم الآثار الإسلامية( بصراحة ليهم حق)، اصل لو بصينا هنلاقى الراجل السلطان حسن أقصد كان بيصرف حوالى 100 دينار دهب يوميا على عمارة المدرسة.. عايزينها تبقى ايه بأه يعنى!!
المسجد و المدرسة اتبنوا على مساحة 7906 يعنى حوالى 2 فدان، حاجة كده ترمح فيها الخيل تلاتين يوم ما تجيب آخرها...
و كان معيين اتنين دكاترة: طبيب عيون و طبيب باطنة،
و كلم بتاع الاسنان بس كان طالب مبلغ فالسلطان حسن حلَقله ( من عندى دى)
ما علينا كنت قريت ان السلطان حسن كان مقضيها و واكل بيت المال و كان راجل مستبد و عشان كده الناس اعتقلوه و جابو اخوه الحاج الصالح صلاح الدين صالح، بس اميرين كده اسمهم صرغتمش و شيخون(عادى عادى ، أذواق)، هما اللى حسوا إن الصالح شايف نفسه فشالوه و رجعُّوا الناصر حسن بن محمد بن قلاوون...
و كان معيين اتنين دكاترة: طبيب عيون و طبيب باطنة،
و كلم بتاع الاسنان بس كان طالب مبلغ فالسلطان حسن حلَقله ( من عندى دى)
ما علينا كنت قريت ان السلطان حسن كان مقضيها و واكل بيت المال و كان راجل مستبد و عشان كده الناس اعتقلوه و جابو اخوه الحاج الصالح صلاح الدين صالح، بس اميرين كده اسمهم صرغتمش و شيخون(عادى عادى ، أذواق)، هما اللى حسوا إن الصالح شايف نفسه فشالوه و رجعُّوا الناصر حسن بن محمد بن قلاوون...
بس واللهى الراجل باين من الكلام انه كويس ، يعنى تحفيظ قرآن و تفسير و تعليم أيتام قرآن و خط ، لأ وإيه كان متكفل بيهم كسوة و أكل، وكان عامل مكتبة، و على فكرة على فكرة ، المدرسة كان فيها حضور و غياب( كريديت أورز يا جماعة، راجل واصل، خريج جامعة أمريكية)
شكلى طولت عليكم، بس بجد فى كلام كتير لسه.. بس يالا بأه عشان تعرفوا تذاكرو اللى هتمتحنوا فيه....
ده بأه المنظر من السلطان حسن و قدامه جامع الرفاعى
22 comments:
ايه الحدودتة دى
اول مرة اسمع قصة منك
ده انتى هاطلعى ام جامدة اوى
نصيحة بلاش تحكى ققص لاولادك قبل ما يناموااا
ولا اقولك هما هايجبوه من بره ما اكيد هايطلعوا لماماتهم
:D
الصور جامدة يا سلمى
صور تدل ان مش اى حد بيصور.. كمان على اسمك فى الجريدة "الفنانة سلمى"
:)
مالها بأه مامتهم يا استاذه دينا هانم، ده انا مشروع مؤرخ يا بنتى
و شكرا على رايك فالصور.(أتمنى ماتكونش مجاملة)
ماماتهم زى العسل طبعا
وانا اقدر اقول غير كده
ومجاملة ليه بقى
ماالصور اهى بتتكلم
مش عشان صحبتى وبتاع
!!وعامة سيبى الناس تحكم
حلوة أوى طريقة عرض المعلومات بالقصة اللى فيها روح الدعابة و الفكاهة و برضو الصور حلوة جدا خاصة الsignature بتاعتك, شغل محترفين.
انا نفسى ضحكت أوى لما قرأت الموضوع بالرغم من حالتى النفسية الضايعة.
ربنا يوفقك ان شاء الله فى حياتك, انتى عندك موهبة جبارة و اوعى تسمحى لنفسك انك تدفنيها.
:)
الصور حلوه اوي يا سلمى بس انتي حاطة عليها ووتر مارك اسرقها انا ازاي بقى دلوقتي؟؟
وكمان جميل اوي اسلوب السرد بتاعك بينم عن لماضه غير عادية .. بصراحة يعني
وعجبتني اوي المقارنة بين جوامع زمان اللي فيها مدرسة ومدارس دلوقتي الليممكن يكون فيها جامع
المهم ان الصور جامدهاوي يا سلمي ابقي هاتي بقيت الصور اللي حكيتي عنها
بقى السلطان حسن حلق للراجل
:):):)
طبعا ده العادى بتاعك، بحب أوى طريقتك يا سلمى يا لمضة
بس خلى بالك بقى إن أنا المفروض كنت أجى معاكم، بعدين أنت وعدينى وقلتيلى لا أكيد لازم نروح وعشمتينى وفى الخر حلقتيلى زى السلطان حسن ما عمل للراجل.. فاكرة ولا نسيتى
سلوووومه جميل اوى فكرتينى بالايام الجميله اللى قضناها فى مشروع التصوير والاماكن الروعه اللى زرناها
ده غير طبعا اسلوبك الوهمى اللذيذ فى سرد المعلومات _اللى هنمتحن فيها_:)برافو
بجد عندك قدرة على توصيل معلومات يمكن تكون دسمه باسلوب لطيف وخفيف
وطبعا الصور لا تعليق فعلا الفنانه المتكامله
الموسوعه سلوم:)
الصور رائعه جدا جدا جدا جدا يا جدعان عقدتونى دانا لما بصور واحد صاحبى بالموبيل والصوره تطلع كويسه بحس انى عملت انجاز
:D
وطريقه سردك للقصه بتاعة عم حسن البقال الى على اول الشارع والاسطه صلاح العجلاتى كانت حاجه ممتعه جدا
نادر جداٌ لما الواحد يلاقى مواضيع من النوع ده على البلوجز مؤخراٌ .. جميل الموضوع والأسلوب البسيط ...
الحقيقة أن قيمة البناء ده مش بس فى ضخامته ولا فى جماله لكن كان ليه تصميم محسوب علشان ينقل المصلى من عمومية الشارع لقدسية مكان الصلاة عن طريق حتت مضلمة وبعدين حتت منورة لحد الوصول للايوان الكبير ، كمان الفتحات معمولة بشكل يعمل تحريك للهوا علشان كده بتحسى بتيار خفيف و ان الجو الطف من بره كتير وحاجات تانية كتير بتخلى المكان ده زى مبيقولو Masterpiece
ده لما كان لسه الناس عندها ضمير وأمخاخ وابداع وكلام من ده
والله يبقى لطيف لو كل كام مره تكتبى حاجة شبيهه
el-teneen
أهم حاجة ان الشغل عجبك يا كابتن تنين..
و خلى الضحك علينا :)
mohamed
يا عم اسرق براحتك، انا اصلا عايزة اشيل الووتر مارك دى بس مكسلة مش أكتر و على العموم كل الصور تحت أمرك يا فندم
لكن فين اللماضة دى....
شيموووووووو
هو بصراحة الراجل ماكلموش اصلا، انا بس بتبلى عليه
و بجد لازم اوديكى الجامع ده، حكاااية
و على العموم ، انا لسه فى دماغى و مش هستريح إلا لما اوديهولك ان شاء الله
هدهد
فاكرة الأيام دى، من أحلى أيام حياتى واللهى... و انا مش أد الكلام الجامد ده :) هاخد ألم فى نفسى كده
و هسألك لما اشوفك فى اللى انتى قريتيه..
عمرو الببلاوى
بترفع معنوياتى انت على طول كده، و اهم حاجة انك انبسط، و عامة لو اتزنقت فى أى حاجة عايز تصورها هاقولك تصورها ازاى، بس هاتكره حياتك من الصور بعد كده :)
santakarim
فعلا ، و انت داخل الجامع بتحس انك انفصلت تماما عن الشارع، ده غير ان فى شباك اول ما تدخل على جنينة، اكنك باصص لنور بعد ظلام، يعنى أصغر شباك وراه معانى كتير..
كمان زخرفة الحوائط بتبينها أعلى من أرتفاعها الحقيقى..
طبعا شكرا على المعلومات اللى اضفتها، و ان شاء الله هكتب حاجات كده كل فترة
و شكرا جدا على المرور
أكتر حاجة صح هي العلامة المائية عشان الصور متتسرقش
صورك هايلة أوي يا سلمى فعلا ما شاء الله، صور فنية فعلا، حتى صور عجيبة بتقول كدة
متحرميناش كتير من عدستك
عمرو زقزوق، اسعدنى تعليقك جدا، و اسعدنى اكتر ان الصور عجبتك يا فندم
واللة ممتع , خمسة سياحية فى المحروسة , تشعرنا بالجمال وتنعش احاسيسنا , ياريت تواصلى هذة الجولات
أوعدك يا أبى العزيز انى آخدك فى جولات تدوينية من هذا القبيل فى المحروسة،، احنا مايهمناش غير انعاش و سعادة حضرتك
التصوير جميل
راحة غير عادية تنتابك وانت داخل المسجد
سبحان الله
سبحان الله فعلا..
و شكرا للتعليق
صور جامده جدا على فكرة
انا مطلوب منى بحث فى الجامع ومش لاقى كلام بصراحه يكفى عشر ورقات فلوسكاب
مطلوبين منى لو عندك اى معلومات ممكن تفيدنى اكتب بيها العشر ورقات ياريت تفيدينى
ايميلى dr_khashoob@hotmail.comوشكرا مقدما
حلوه قوي الصور دي يا سلمى خاصة بتاعت هو جامع الرفاعي يعتبر من اضخم الجوامع في القاهره و كذلك السلطان حسن بس للاسف انا مرحتش و لا واحد منهم بس بجد البوست ده هيخليني لازم ازورهم و معايا مشمشه
:))
Meshmeshah = My cam
طريقة عرض جميلة للموضوع
انا مرشد سياحى واحب اضيفلك تاريخيا ان عصر السلطان حسن معروف لدى الاثريين بعصر الكوارث لانه حكم مصر على فترتين
الفترة الاولى حدثت مجاعة ومات فيها حوالى نص سكان القاهرة وفى فترة حكمة الثانية سقطت احدى ماذن الجامع ومات تحتها تلاتين واحد
أنا مش عرف الكلام متأخر ولا لأ ، أنا كنت بشوف جوجل عشان أتعرف على المكان الساحر اللي راح إلو اوباما إليوم ، وأنا أدور في جوجل على معلومات جامع السلطان حسن شفت الصور اللي مصوراهم سلمى ، الصور حلوة خالص ، متشكر يا سلمى ، أنا عايش في أمريكا وجيت في زيارة لمصر من سبع سنين ، السحر اللي في مصر ما فيش زيو ، على فكرة أنا مش مصري بس بحاول أتكلم مصري ، أعتقد أن التاريخ المصري تاريخ حافل وغني ، كنت عم بحاول أعرف مكانة المكان المميز اللي راح إلو الرئيس اوباما فتفاجئت بقدر كبير من المعلومات الموجودة ضمن تاريخنا وأصولنا يجهلها عامة الناس ، اتمنى أن نقوم بإعادة إحياء مجدنا ، بأن نتعلم العطاء ، والحب ، وعدم إبغاض الأخرين ، وأحترام بعضنا البعض ، وأن نصلح أنفسنا من الداخل ، ونملأ أنفسنا بالحب والمودة وتقديس كلام الرب .
Post a Comment