بجد يا جماعة اعذرونى فالبوست الرخم اللى انتو على وشك قرايته.. أنا نفسى حاسة باحساس قوى بالرخامة من قبل ما اكتبه، فياريت نصبر كده و احنا بنقرا....براحة كده: انا شوفت فالكام يوم ده حاجات عجيبة أوى، نوعيات ناس غريبة، و تصرفات تخلى الواحد يذبهبل (إلا هى بتكتب الذال ولا بالزين)،، ما علينا يعنى ناس مستعدة تعمل أى حاجة لأى حد، يعنى تحرج أى حد، تكسف أى حد، تستغل أى حد،، ممكن يعمللك موقف يشترى بيه اسلامك و يحسسك انك لازم تدفع التمن(لانه عمللك اللى ما يعمل قال)
طبعا فى ناس بتقرى و هى فاهمة و قبل ما تترسم على وشكو الابتسامة بذمتكم مش أنا بقول كلام ممكن يكون صح؟؟؟؟؟؟
ناس بترسم مواقف من الهوا و تعيشك فى حوارات متألفة مالهاش دعوة بالواقع لأجل انها تعمل موضوع... طب ليه طيب؟؟؟
ناس ترزع الكلمة و ولا كأنها قالت أى حاجة.. ايه ده!!!
و ناس بصراحة تقول الكلمة و تأنب نفسها.. دول ماشى ، كلنا ممكن نغلط يعنى، لكن نغلط و نعمل عبط، لأ و ألف لأ...
ناس تستفزك بأسئلة و تلف و تدور و لما انت تيجى تسألهم، ياريت يسكتوا ،لأ دول يقلولك كلام مالوش علاقة بالواقع...
ناس يعيشوك فالجنة و ساعة الجد، يركِّبوك عفاريت الدنيا...
ناس تتعامل معاهم بطيب نيه، تكتشف انك بتاخد ( ولا مؤاخذة ) على قفاك.....و تكتشف انهم بيفهموك بطريقة مرضية.. ربنا يرحمنا منهم بجد...
و ناس تنحنى لهم احتراما، رغم انك ماكلمتهومش مرتين تلاتة على بعض.. بس محترمين.
ناس مش عارفين يعتمدوا على نفسهم، و رايحين يدوروا على حد يقبل يعتمد عليهم، ياعم اعتمد على نفسك الأول عشان اعتمد عليك.
و ناس يعملولك البحر طحينة، و بعد كده تكتشف المأساة و الواقع المؤلم....
دى حاجة ، غير نوعيات كتييير اوى هسكت و مش هجيب سيرة عنهم لإنهم عايزين بوست أو بالأصح مدونة خاصة...
الواحد فى فترة مش كبيرة يعنى، شاف كل ده، يا حول العالم، دعك دعك يعنى، لأ و لسه، ربنا يستر....
غير ان جايالى حالة عجيبة، يعنى فى مواقف أى انسان طبيعى المفروض يبقى محرج و هو فيها، مش عارفة ليه عندى حالة من التبلد الغير طبيعى( اللهم موقف واحد اتحرجت فيه) بس خلاص لحظة و عدت و رجعلى احساس التبلد تانى( مضايقة اوى من كده)....بس معلش اهى حالة زى خمسمية حالة جوملى قبل كده و راحوا لحال سبيلهم......
كلمة أخيرة :
ماما ربنا يخليكى ليا، و شكرا على رحابة صدرك و ثقتك الغالية
دينا: شوفتى ادينى بقيت (ات......) زى ما قولتلك، نئيت فيها، عايزة ارجع زى ما كنت.
13 comments:
ياباشا ولا يهمك من الناس الرخمة دى
رخمى على اهلهم
عايزة اقولك حاجة
احنا بجد كويسين ويارب نفضل كده
بس الواحد بيتعلم وبيشوف نوعيات من البشر
يابنتى هى دى ضريبة معرفة الناس لانهم مش ملايكة
الاهم بقى انك ماتتعبيش نفسك هما ليه كده
ولا تقولى هو انا صح ولا هما اللى صح
هاتبقى صح لما تشترى دماغك من التفكير
وزى ما بيقولوا الواحد مش بيتعلم ببلاش
وعلى فكرة انتى كده طبيعية يعنى لا
نئيت فيها ولا حاجة
عامة الفترة الجاية محتاجة مننا نكون لوح تلج عشان نعرف نستمر,, ربنا يستر
ملوحظة: فكك من اى حوار فكسان يخليكى ولو لثانية تضايقى.. ولا حاجة تستاهل لحظة تضايقى فيها نفسك يا جميل
سلووومه بوست عميق اوووووووى
انا حاسه بيكى يا جميله ، ربنا يكون فى عونك بس ده شىء مش سىء لانك بتعرفى البشر ومعادنهم وان مش كلنا ملايكه ولا زى بعض وبتكتسبى خبره فى الحياه تحميكى من الاصناف اللى اشرتلها او غيرهم
صحيح فى البدايه بتحسى انك ماتتمنيش تقابلى اشخاص بالشكل ده بس اكيد هى خبره ..استفيدى منها وماتخليهاش تصدمك او تغيرك
معلش على التطويل
اتمنالك كل خير وسعاده يا سلومه
أحب أتكلم بداية من العنوان (ليه-هه-ليه), جملة استفهامية تفيد الإستغراب من حاجة جديدة او موقف غير متوقع من شخص تعرفيه فى أغلب الأحيان.
اما عن الموضوع فخللى بالك ان مش كل الناس زى بعضها, يعنى الدنيا مليانه ناس مش كويسة و ناس أكتر كويسين , و بيبقى الدور عليكى انتى فالاختيار انك تكونى من الناس الكويسين أو لأ, و ده بيعتمد على ثقافتك و تفكيرك انتى.
لكن متحاوليش تبصى للناس كلها كأنها شخص واحد اجتمعت فيه كل الصفات الوحشة و الكويسة.
و بعدين انتى ما شاء الله اصحابك كلهم كويسين جدا و ولاد ناس كده زى ما بيقولوا :) .
دينا:
ماشى يا دودو هفكنى من الحوارات اللى ممكن تضايقنى، رغم انها غاصبن عنى بتخلينى هتفقع يعنى...
و عنيا اللى يرخم عليا هرخم على اهله(علمتينى اقول الفاظ مش كويسة بس يالا)
اهو بتعلم و خلاص..
هدهد:
فعلا الواحد بيتعلم جدااا منهم، و مش بتمنى انهم ماكانوش موجودين فى حياتى لانى فعلا استفدت و عرفت ازاى اتعامل مع نوعية جديدة ..و ياستى البلوج بلوجك ، يعنى طولى براحتك
el-teneen:
بداية العنوان بتعبر زى ما قولت عن استغراب ، لأ و استغراب شديد، لإنى فعلا و للأسف شوفت موقف غير متوقع من ناس معينة ، و انا تعاملى مع ناس مش تمام بيخلينى اقدر اعرف الكويس من اللى مش كويس عشان اختار ابقى مع ميين.
و الحمد لله ان اصحابى ناس كويسين، لانهم بياخدوا بإيدى فى أى موقف احتاجهم فيه
بس بتغااظ أوى من اللى يقدر يفهمنى انه شخص عادى و هو أبعد ما يكون عن العادية...
بصى يا سلمز، الناس ده حيقابلك منهم كتيييييير وخصوصا اللى بيحبوا يعملوا البحر طحينة دول واللى بيرسموا نفسهم كتير جدا وفى نوعيات تانية أسوأ
الحل إن احنا بقى نتعامل معاهم بس نتعامل مع كل واحد بالأسلوب اللى يستحقه، يعنى لو يستاهل يأخذ على دماغه يبقى يأخذ على دماغه
بس عارفة احنا مشكلتنا فعلا إن احنا مؤدبين بزيادة علشان كده ما بنعرفش نتعامل مع الناس ده بس زى ما دينا قالت حاولى تبقى لوح ثلج فى الفترة اللى جاية ده وجمدى أعصابك على الاخر خصوصا وأنت بتشتغلى فى الصحافة
:):):)
وخلى بالك من نفسك يا سلومة ومضايقيهاش
يا سلمي الناس دي تحت مستوي نظرك لو حب حد منهم يشب ويطلع عشان يبان في الصورة ويدخل في مجال الرؤية فديله فوق دماغه رجعيه لجحمة الطبيعي علي طول
والناس دي اقل من انك تفكري فيهم او يشغلوا جزئ من تفكيرك
والغريب انهم بيقوا فاكرين نفسهم أذكيا وممكن يضحكوا عليكي ويعيشوا في الدور وهما الغباء بذاته
واكتر نوعيه بتخنق منها اللي عمرو مسميهم كلب البحر
يا ربى يا سلمه دانتى كتبتى الى انا حاسس بيه وخصوصا اليومين دول واذا كنتى مفقوعه قيراط انا مفقوع اربعه وعشرين قيراط وامانه عليكى يا شيخه لو عرفتى اذاى تشترى دماغك زى ما دينا قالتلك وعرفتى الطريقه الى تخليكى تفكر نفسك منهم تقوليلى اذاى ونبى وربنا يجعله فى ميزان حسناتك لحسن انا بقيت فى مرحله بقول ليه يارب مخلقتنيش بارد
شيمو:
المشكلة فعلا اننا لو لتعاملنا معاهم بنفس طريقتهم هنبقى زيهم،، بس فى نفس الوقت مش هنتعامل معاهم على طبيعتنا و لازم نكون حذرين جدا فى التعامل معاهم. و اهو الواحد بيحاول يبقى لوح تلج وربنا يعيننا.
محمد:
المأساة الحقيقية انهم بيفتكروا نفسهم عدوا مرحلة الذكاء و داخلين فالعبقرية، و مش عارفين انهم مفهومين و مفقوسين على الآخر.
بس للأسف تواجدهم معانا فى نفس المحيط هو اللى بيفرض أنهم يشغلوا جزء من تفكيرنا
عمرو الببلاوى:
بص انسب طريقة و دى اللى أنا بالفعل مشيت عليها، هى انى اعمل عبيط، يعنى ولا كأن فى أى حاجة من أى نوع، بس انا ابدا احرك الموقف بمزاجى و على راحتى( مش هما اللى بدأوا بالحوارات، اشربوا بأه)
سلومه عجبني أوييي تصنيفك لنوعيات البشر, ايشي بيرزع الكلام و ايشي يعمل عبيط و حتة اللي بياخد على قفاه :).....
عشان أنت و أنا و معظمنا قابل مثل هذه الأصناف من البشر لازم نتعلم ازاي نتعامل مع كل منهم ....عشان نستمر في الحياه اللي أصلا ملييئه بالمصاعب و الكفاح و يكون استمرار كله موده و حب ,رحمه و خير :)
اثناء تجوالى خلال العنكبوتية لقيت الموقع دة ولقيت ان دمة خفيف , وهو بيبين بعض الانماط من اللى بتتكلمى عنهم والطريقة اللى ممكن تتعاملى بيها معاهم , شوفى وابقى ادينى رأيك
http://bafree.net/forum/viewtopic.php?t=30385
وعل فكرة انا عملت بوست جديد ومتهيألى إنة عايز مناقشات كتيرة , ياريت يعجب
salma
نورتى البلوج يا سلومة
و المفروض اننا نعرف انسب طريقة للتعامل مع هؤلاء، بدلا من تحاشى التعامل معهم
gazzar50
الموضوع فعلا لذيييذ أوى، و جايب نوعيات أكتر كمان...
و أيه البوستات الجامدة دى، التعليق بأه هيبقى هناك عندك.
يمكن تكرار الأحداث يصيبنا ببعض التبلد
Post a Comment